நேற்று முன்தினம் (மே 19) கர்நாடக ஆளுநர் வஜுபாய் வாலாவைச் சந்தித்து ஆட்சியமைக்க உரிமை கோரினார் குமாரசாமி. இதையடுத்து, மஜத – காங்கிரஸ் அமைச்சரவை பதவியேற்பு விழா வரும் 23ஆம் தேதியன்று பெங்களூருவில் நடைபெறுமென அறிவிக்கப்பட்டுள்ளது. அமைச்சரவையில் மஜத சார்பில் 20 பேரும் காங்கிரஸ் கட்சியின் சார்பில் 13 பேரும் இடம்பெறுவார்கள் என கூறப்படுகிறது. உத்தேசமான அமைச்சர்கள் பட்டியலும் நேற்று வெளியானது.
இன்று (மே 21) டெல்லியில் காங்கிரஸ் கட்சித் தலைவர் ராகுல் காந்தி மற்றும் சோனியா காந்தியைச் சந்திக்கவுள்ளார் குமாரசாமி. அதன் பிறகே, கர்நாடகாவில் பொறுப்பேற்கவுள்ள அமைச்சர்கள் பட்டியல் வெளியிடப்படும் என்று எதிர்பார்க்கப்படுகிறது. தற்போதுள்ள அமைச்சர்கள் பட்டியலில் பகுஜன் சமாஜ் கட்சியைச் சேர்ந்த கொள்ளேகால் சட்டமன்ற உறுப்பினர் மகேஷின் பெயரும் இடம்பெற்றுள்ளது. அந்தப் பட்டியலில், அவருக்குச் சமூக நலத்துறை ஒதுக்கப்பட்டுள்ளது.
நடந்து முடிந்த தேர்தலில் மதச்சார்பற்ற ஜனதாதளத்துடன் கூட்டணி அமைத்த பகுஜன் சமாஜ் கட்சி 20 இடங்களில் போட்டியிட்டது. இதனை முன்னிட்டு, அக்கட்சியின் தலைவர் மாயாவதி பல இடங்களில் பிரச்சாரம் மேற்கொண்டார். 2013ஆம் ஆண்டு கொள்ளேகால் தொகுதியில் தோல்வியுற்ற மகேஷ், இந்த ஆண்டு 31,362 வாக்குகள் பெற்று முதலிடம் பிடித்தார். இதற்கடுத்த இடங்களை காங்கிரஸ் மற்றும் பாஜக வேட்பாளர்கள் பெற்றனர்.
சமீபத்தில் உத்தரப் பிரதேசத்தில் நடைபெற்ற கோரக்பூர் மற்றும் புல்பூர் மக்களவை தொகுதி இடைத்தேர்தலில் பகுஜன் சமாஜ் மற்றும் சமாஜ்வாதி கட்சிகள் கூட்டணி அமைத்துப் போட்டியிட்டன; இரு தொகுதிகளிலும் சமாஜ்வாதி கட்சி வெற்றி பெற்றது. இந்தத் தேர்தலில் காங்கிரஸ் கட்சி டெபாசிட் பெறவில்லை. மஜத – காங்கிரஸ் அமைச்சரவையில் பகுஜன் சமாஜ் கட்சியைச் சேர்ந்த மகேஷ் இடம்பெறுவது, தேசிய அரசியலிலும் பல மாற்றங்களை ஏற்படுத்தும் என்று எதிர்பார்க்கப்படுகிறது.
.
No comments:
Post a Comment