அமெரிக்கா மீது இந்தியா புகார்! ஸ்டீல் பொருள்கள் மீது அமெரிக்க அரசு இறக்குமதி வரி விதித்துள்ளதால், இந்த விவகாரத்தை உலக வர்த்தக அமைப்பிடம் இந்தியா எடுத்துச் சென்றுள்ளது. அமெரிக்காவில் ஸ்டீல் பொருள்கள் மீது இறக்குமதி வரி விதிக்கப்பட்டால் இந்தியாவில் ஸ்டீ

அமெரிக்காவில் ஸ்டீல் பொருள்கள் மீது இறக்குமதி வரி விதிக்கப்பட்டால் இந்தியாவில் ஸ்டீல் பொருள்கள் ஏற்றுமதி பாதிக்கப்படும் என்றும், இந்த நடவடிக்கை உலகளாவிய வர்த்தக விதிமுறைகளுக்கு முரணாக உள்ளதாகவும் உலக வர்த்தக அமைப்பிடம் இந்தியா தெரிவித்துள்ளது. இதுகுறித்து அதிகாரி ஒருவர் பேசுகையில், “ஸ்டீல் மற்றும் அலுமினியம் பொருள்களுக்கு அமெரிக்க அரசு இறக்குமதி வரி விதித்துள்ளது. இந்த விவகாரம் குறித்து உலக வர்த்தக அமைப்பில் இந்தியா ஒரு மனுவைத் தாக்கல் செய்துள்ளது” என்று கூறினார். உலக வர்த்தக அமைப்பின் சர்ச்சைத் தீர்வு அமைப்பின் கீழ் அமெரிக்காவுடன் ஆலோசனை நடத்த இந்தியா கோரிக்கை விடுத்துள்ளது.

இரு நாடுகளுக்கும் இடையே முதற்கட்டமாகப் பேச்சுவார்த்தை நடத்தப்படும். பேச்சுவார்த்தை மூலமாகத் தீர்வு காண இயலாவிடில் இந்த விவகாரம் குறித்து ஆய்வு செய்ய உலக வர்த்தக அமைப்பின் சர்ச்சைத் தீர்வுக் குழுவிடம் இந்தியா ஒரு கோரிக்கையை முன்வைக்கும். மார்ச் 9ஆம் தேதியன்று ஸ்டீல் மற்றும் அலுமினியம் பொருள்களுக்கு அமெரிக்க அதிபர் டொனால்டு ட்ரம்ப் கடுமையான இறக்குமதி வரிகளை விதித்தார். இதனால் உலகளாவிய வர்த்தகப் போர் எழும் என்றும் அஞ்சப்பட்டது.

கனடா மற்றும் மெக்ஸிகோவில் இருந்து இறக்குமதி செய்யப்படும் ஸ்டீல், அலுமினியப் பொருள்களைத் தவிர மற்ற நாடுகளின் ஸ்டீலுக்கு 25 விழுக்காடு இறக்குமதி வரியும், அலுமினியத்துக்கு 10 விழுக்காடு இறக்குமதி வரியையும் டொனால்டு ட்ரம்ப் விதித்தார். இறக்குமதி வரியில் இருந்து இந்தியாவுக்கு விலக்கு அளிக்குமாறு இந்திய அரசும் கோரிக்கை வைத்தது. ஒவ்வொரு ஆண்டும் அமெரிக்காவுக்கு இந்தியா அனுப்பும் ஸ்டீல் மற்றும் அலுமினியப் பொருள்களின் மதிப்பு சுமார் 22.3 பில்லியன் டாலராக இருந்துள்ளது என்பது குறிப்பிடத்தக்கது.