நியாய விலை கிடைக்காத விவசாயிகள்! யிர்களுக்கு நியாயமான விலை வழங்கப்படும் என்று

பயிர்களுக்கு நியாயமான விலை வழங்கப்படும் என்று பீகார் அரசு உறுதி அளித்திருந்தபோதிலும் விவசாயிகள் பயிர்களை மலிவு விலையில் விற்பனை செய்யும் நிலைக்குத் தள்ளப்பட்டுள்ளனர்.

பீகார் மாநிலத்தில் கோதுமையைக் கொள்முதல் செய்ய அரசு சார்பில் சரியான முயற்சிகள் இல்லாததால் விவசாயிகள் தங்கள் பயிர்களைக் குறைந்த விலையில் விற்பனை செய்துவருகின்றனர். இந்தியாவில் ராபி சந்தைப்படுத்துதல் பருவம் ஏப்ரல் 1ஆம் தேதி முதல் தொடங்கும். ஆனால், சந்தைப்படுத்துதல் பருவம் தொடங்குவதற்கு முன்பே குஜராத், மத்தியப் பிரதேசம், ராஜஸ்தான் போன்ற மாநிலங்களில் மார்ச் 15ஆம் தேதி முதலே பயிர்கள் கொள்முதல் செய்யப்பட்டு வருகிறது. பீகார் மாநிலத்திலிருந்து 2 லட்சம் டன் கோதுமையைக் கொள்முதல் செய்ய மத்திய அரசு இலக்கு நிர்ணயித்திருந்த நிலையில், கொள்முதல் நடவடிக்கைகளில் மாநில ஏஜன்சிகள் பங்களிக்கவில்லை.

கோதுமையை 100 கிலோவுக்கு 1735 ரூபாய் என்ற குறைந்தபட்ச ஆதரவு விலையில் நேரடியாக விவசாயிகளிடமிருந்து கொள்முதல் செய்ய ஏற்பாடு செய்யும்படி அதிகாரிகளுக்கு அரசு அறிவுறுத்தியுள்ளதாக பீகார் மாநில உணவு மற்றும் நுகர்வோர் பாதுகாப்பு அமைச்சர் மதன் சகினி தெரிவித்துள்ளார். அரசின் கொள்முதல் நடவடிக்கைகள் தாமதமாவதால் கோதுமை விவசாயிகள் 100 கிலோ கோதுமையை 1,400 முதல் 1,500 ரூபாய் வரை விற்பனை செய்து வருகின்றனர். கோதுமை கொள்முதலை அரசு விரைவில் தொடங்கும் என்று எதிர்பார்த்துக் காத்திருப்பதாக சில விவசாயிகள் தெரிவித்துள்ளனர்.